கார் பார்க்கிங்கும் கார்களும்

நீண்ட நிலப் பரப்பில்
நிற்கும் வண்டுகள் போல்,
பல உருவில் கார்கள்
பார்க்கிங்கில் நின்றிருக்கும்.
தரையில் நீட்டி இழுக்க
உதிர்ந்த சரவெடி போல்,
இருபுறம் அணிவகுத்து
ஆங்காங்கே நின்றிருக்கும்.
கட்டும் கதம்பம் போல்
முட்டி மோதி இல்லாமல்,
அளவாய் இடம்விட்டு
வண்ண மயமாய் நின்றிருக்கும்.
எட்டி நின்று பார்த்திடவே
குட்டி குட்டிப் பூக்கள் போல்,
பல வண்ணத் தூவலாய்
ஒட்டி ஒட்டி நின்றிருக்கும்.
வரிசையாய் அருகருகே
வாழைப்பூ அடுக்கு போல்,
அடுக்குமாடிக் கட்டிடத்தில்
அடுக்கடுக்காய் நின்றிருக்கும்.
அரண் தாங்கும்
அணி வகுப்பு போல்,
பரந்த பொட்டலிலும்
பக்கத்தே நின்றிருக்கும்.
குட்டிக் கார்களும்,
அதை விஞ்சுவது போல்,
கூடவே பெருங் கார்களும்
கூட்டம் கூட்டமாய் நின்றிருக்கும்.
திட்டுத் திட்டாய் திரண்டு
உருளும் அலை போல்,
விட்டு இடம் தள்ளி
உருளாமல் நின்றிருக்கும்.
நீண்ட மீன் எலும்பின்
இருபுற முள் போல்
கிடைக்கும் இடைவெளியில்
குத்தாமல் நின்றிருக்கும்.
தலை கோதும் சிறு,
சீப்பின் பல் போல்,
இருக்கும் இடைவெளியில்
இணைத்து நின்றிருக்கும்.
